Guddiga Madaxa bannaan ee Doorashooyinka Qaranka iyo Soohdimaha ayaa maanta si rasmi ah magaalada Baydhabo uga furay tababar ballaaran oo loogu talagalay qaybaha kala duwan ee bulshada ee ka qayb qaadanaya hannaanka doorashooyinka Dowlad goboleedka Koonfur Galbeed Soomaaliya.
Tababarkan oo ah mid muhiim u ah hufnaanta iyo guusha doorashooyinka “Qof iyo Cod” ah, ayaa waxaa loo qabtay:
- Wakiillada Ururrada Siyaasadda: Si ay u fahmaan hab-raacyada rasmiga ah ee tartanka iyo ilaalinta xuquuqda murashaxiinta.
- Korjoogtada: Si loo baro hannaanka kormeerka goobaha codbixinta iyo sidii loo hubin lahaa in doorashadu u dhacdo si xalaal ah.
- Warbaahinta: Si loogu qalabeeyo aqoonta tebinta wararka doorashooyinka si dhex-dhexaad ah iyo xog-ogaalnimo leh.
Guddiga ayaa xusay in tallaabadan ay qayb ka tahay dadaallada lagu xoojinayo kalsoonida shacabka iyo daneeyayaasha siyaasadda, iyadoo la hubinayo in qof kasta oo qayb ka ah hannaanka uu u guto waajibaadkiisa si waafaqsan shuruucda doorashooyinka dalka.
Tababarkan ayaa imaanaya xilli magaalada Baydhabo ay ka socdaan diyaar-garowgii ugu dambeeyey ee loogu jiro qabashada doorashooyinka Golaha Wakiillada iyo Golayaasha Deegaanka ee Koonfur Galbeed.
